香港手機遊戲網 GameApps.hk

如月冰的宅指揮部第二十一回:變態女僕與可愛幼女的搞笑日常

2019-01-11 670
大家好,歡迎收睇如月冰的宅指揮部,我係 Gameapps.hk 小編之一既如月冰。身為聲優廚既我一直有留意下聲優動態,最近發生左兩件事真係令我好感慨,當然有喜亦有悲。先講下喜,就係今日《刀劍神域》亞絲娜既聲優戶松遙突然宣佈結婚,恭喜晒!而悲就係《偶像大師 ML》白石紬聲優南早紀(炸雞)尋日突然刪除 Twitter 帳號,懷疑係被其他聲優既惡質 FANS 搔擾,不過原因未明都係唔好作太多猜測,希望佢無咩事啦。

戶松遙結婚喜訊,恭喜!(一般男性又大勝利)

南早紀突然刪除 Twitter,真係太突然...

講完啲聲優題外話,介紹番今次講既動畫《我家的女僕有夠煩!》(うちのメイドがウザすぎる!),呢套作品吸引我睇既地方除左係可愛既金髮蘿莉之外,就係當中既爆肌女僕,題材相當特別,而且個人都比較鐘意呢類輕鬆小品作。

《我家的女僕有夠煩!》故事講述俄羅斯金髮蘿莉米夏,因為媽媽去世之後,拒絕與人接觸,一直躲在房間又不願上學,爸爸又因為工作關係,經常不在家中。所以請傭人去照顧米夏日常生活,不過米夏並不喜歡,將所有請黎既傭人都趕走,直至遇到自衛隊退役軍人主角鴨居燕。

本作係人物設定上相當特別,而且個性獨特表情豐富,所以每集氣氛都非常歡樂。主角鴨居燕係一位爆肌退役軍人,而且受過不同刻苦訓練,所以米夏既惡作劇對佢黎講只係小菜一碟,而且佢仲有一個常人會覺得變態既興趣,就係對幼女有異常既執著同戀愛,簡單黎講就係女性既蘿莉控。

雖然鴨居燕本身係自我滿足而應徵到米夏家中做女僕,不過佢出色既工作能力同態度認真,令米夏想趕走鴨居燕都無從入手,而且出色既料理手藝緊緊鎖住米夏同爸爸康弘兩人既胃袋!雖然鴨居燕初初係為私慾,不過同米夏相處後,發現米夏有相當多心結,因為外表成為班上焦點,所以拒絕上學等等。

米夏因為害怕鴨居燕既變態發言,所以一直保持距離,不過鴨居燕雖然經常口出變態發言,不過其實相當照顧、寵愛米夏,亦用不同既方法令米夏上學、結交朋友,從喪母既陰影中回到正常生活,經歷各種有趣、痛苦既事之後,兩人距離逐漸拉近,最後米夏甚至主動帶鴨居燕到自己心中既聖域,去世母親既工作房,接受鴨居燕成為自己家人般親密既存在。

其實本作故事上並無咩大突破,主要享受變態女僕鴨居燕,同全力拒絕既米夏之間搞笑有趣既互動,作品題材吸引而且搞笑,前段都相當好睇。不過搞笑梗到後段唔夠豐富,亦有點太重覆,劇情上亦較著重親情部分,反而感覺較為失色,不過整體上依然唔想太差,結局亦相當感人,都係一套值得睇既輕鬆作品。

如月冰

Gameapps.hk 小編,重度打機、動漫迷+聲優宅,較鐘意睇萌系、輕鬆、百合番,手機、電腦、PS4遊戲都有涉獵,主玩《FGO》、《少女前線》、《MLTD》、《公主連結R》。

─完─

最新評論
電腦版 | 聯絡我們
© GameApps.HK 香港手機遊戲網 2013-2019