如月冰的宅指揮部第十三回：一款頗有進步空間的免費喪屍線上遊戲

傳說魚努力收集中

今次為大家介紹下一隻幾個月前出既免費喪屍線上遊戲《Dead Frontier 2》，呢隻 GAME 其中一大特色當然係免費啦(笑，雖然話就話係大型線上遊戲，不過其實都係實行 8 人房間制，唔會怕因為太多人而變搶怪遊戲。遊戲有一點幾好係有分 PvP 與 非 PvP 房間，玩家唔怕無故被人惡意 PK，不過強烈建議大家搵相識朋友一齊玩，因為如果單人都幾難上手。

《Dead Frontier 2》走 OldSchool風路線，雖然以 3D 第三身視點玩法，不過每個房間同房屋都係獨立場間，過場需要讀取，不過讀取時間唔長，玩落亦相當流暢。呢種方式反而令我想起以前玩《Biohazard Outbreak》。另外，本作尋實元素高，玩家亦可以升級升技，加上有飽食度口渴度設計，非常有 MMO RPG 感覺。

遊戲玩法雖然簡單，主要都係每棟建築會有一隻 BOSS，玩家要係建築內尋找鎖匙開啟 BOSS 房，打倒 BOSS 獲取裝備，不過遊戲氣氛好，毒性高。不過都有缺點，遊戲內子彈唔多，玩家唔可以故亂使用槍械，好多時要用近戰武器節約子彈，而且初期單人面對 BOSS 相當吃力，所以建議大家相約朋友一齊玩，裝備掉落與尋寶個別處理，大家唔怕同人搶寶物裝備，所以人越多越好。

遊戲整體感覺唔算太差，不過可改進空間依然相當多，例如遊戲內無地圖，如果唔太認路既玩家好易迷路，任務解說不清晰，而且無中文有時唔清楚任務內容，畫面質素唔算非常好，但需要既電腦效能要求唔低。不過官方依然努力改善遊戲品質同修正 BUG，算係一款值得期待同支持既遊戲。

如月冰

Gameapps.hk 小編，重度打機、動漫迷+聲優宅，較鐘意睇萌系、輕鬆、百合番，手機、電腦、PS4遊戲都有涉獵，主玩《FGO》、《少女前線》、《MLTD》、《公主連結R》。